اوورسیز پاکستانیوں کا بڑا معاشی تحفہ، 12 ارب ڈالر وطن منتقل

سمندر پار پاکستانیوں نے ملکی معیشت پر اعتماد کا اظہار کرتے ہوئے روشن ڈیجیٹل اکاؤنٹ پروگرام کے تحت رقوم کی منتقلی میں نیا ریکارڈ قائم کر دیا۔

اسٹیٹ بینک آف پاکستان کے مطابق بیرون ملک مقیم پاکستانیوں نے اب تک 9 لاکھ سے زائد اکاؤنٹس کے ذریعے مجموعی طور پر 12 ارب ڈالر پاکستان منتقل کیے، جس سے اس اقدام کی مقبولیت اور افادیت مزید نمایاں ہو گئی ہے۔

مرکزی بینک کا کہنا ہے کہ روشن ڈیجیٹل اکاؤنٹ نہ صرف ترسیلات زر میں اضافہ کر رہا ہے بلکہ سرمایہ کاری اور بینکاری سہولیات تک اوورسیز پاکستانیوں کی رسائی کو بھی آسان بنا رہا ہے۔

اسٹیٹ بینک نے اس سنگ میل پر سمندر پار پاکستانیوں کا شکریہ ادا کرتے ہوئے کہا کہ ان کا اعتماد ملکی مالیاتی نظام کے استحکام میں اہم کردار ادا کر رہا ہے۔