سہیل آفریدی کااسٹیٹس آف لائن ہے،اب پالیسی جلال آباد نہیں اسلام آباد سے آئے گی، گورنر کے پی

اپیکس کمیٹی کے اجلاس کے بعد پریس کانفرنس میں گورنر خیبرپختونخوا فیصل کریم کنڈی نے کہا کہ اجلاس میں پولیس اور سی ٹی ڈی کو وسائل فراہم کرنے کا فیصلہ کیا ہے

ہم اپنی پولیس کے ساتھ کھڑے ہیں جو وسائل ہیں وہ دیں گے، آئی جی چیف سیکرٹری سے کہا ہے کہ پولیس کی تنخواہیں بڑھائیں، فورسز کے لیے شہداء کا پیکیج بڑھا رہے ہیں۔

وفاقی وزیر داخلہ نے بکتر بند گاڑیاں دی ہیں ہم نے وہ وصول کر لی ہیں کیونکہ ہم امن و امان پر کسی قسم کا کوئی سمجھوتہ نہیں کریں گے۔

فیصل کریم کنڈی نے کہا کہ ہمارا فوکس صوبے کی ترقی اور امن و امان کا قیام ہے، کسی قسم کی توڑ پھوڑ یا ہنگامہ آرائی کی اجازت نہیں اور اگر کسی نے قانون ہاتھ میں لینے کی کوشش کی تو پھر اُسے کوئی رعایت نہیں دی جائے گی۔

انہوں نے سوال کیا کہ یہ کیسی جمہوریت تھی جہاں عوام کو تحفظ تک نہیں تھا، پی ٹی آئی نے دہشتگردی کو سپورٹ کیا۔

فیصل کریم کنڈی کا کہنا تھا کہ جنہوں نے کرپشن کی ہے سب کا احتساب ہوگا، کرپشن کرنے والے گرفتار بھی ہوں گے سزائیں بھی ہوں گی، جن کے خلاف کیسز ہیں وہ مقدمات کا سامنا کریں گے۔

فیصل کریم کنڈی نے کہا کہ لانگ مارچ والا کنٹینر بے یار و مددگار کھڑا ہے، وہ جس کا ہے آکر لے جائیں ورنہ ٹی ایم اے کو دے دیں گے۔ گورنر کے پی نے بتایا کہ ایپکس کمیٹی نے فیصلہ کیا ہے غیر قانونی افغان مہاجرین کو ملک بدر کریں گے، کسی کے پاس کوئی دستاویزات نہیں ہوں گے وہ ملک بدر ہوگا۔

گورنر خیبرپختونخوا فیصل کریم کنڈی نے کہا ہے کہ مجھے انتظار تھا کہ گورنر ہاؤس کا گھیراؤ کرنے والے آئیں گے میں نے ان کی خاطر تواضع کا بندوبست بھی کر رکھا تھا

میں نے میڈیا کے ذریعے سنا تھا کہ گورنر راج لگا تو گورنر ہاؤس کا گھیراؤ کیا جائے گا دیواریں پھلانگ کر آئیں گے تو میں نے بندوبست کرلیا تھا

کافی خرچہ کیا کہ گورنر ہاؤس کا گھیراؤ کرنے والے آئیں گے تو ان کی خاطر تواضع کی جائے گی لیکن وہ نہہں آئے مجھے کا انتظار تھا۔