حکومت کا بڑا فیصلہ، عمران خان کو اڈیالہ جیل سے اسپتال منتقل کرنے کی منظوری

وفاقی حکومت نے بانی پاکستان تحریکِ انصاف عمران خان کو اڈیالہ جیل سے اسپتال منتقل کرنے کا فیصلہ کرلیا ہے۔ حکومتی ذرائع کے مطابق یہ اقدام ان کی صحت سے متعلق معاملات کو مدنظر رکھتے ہوئے اٹھایا گیا۔

وفاقی وزیر پارلیمانی امور طارق فضل چوہدری نے اس پیش رفت کی تصدیق کرتے ہوئے کہا کہ حکومت انسانی ہمدردی اور قانونی تقاضوں کے مطابق ہر قیدی کو سہولیات فراہم کرنے کی پابند ہے۔ ان کے بقول، بانی پی ٹی آئی کی طبی حالت کو دیکھتے ہوئے اسپتال منتقلی کا فیصلہ کیا گیا ہے تاکہ انہیں بہتر طبی نگہداشت میسر آ سکے۔

وزیر پارلیمانی امور نے یہ بھی بتایا کہ عمران خان کو اپنے بیٹوں سے بات چیت کی سہولت فراہم کی جاچکی ہے۔ انہوں نے زور دیا کہ صحت جیسے حساس معاملے کو سیاسی رنگ نہ دیا جائے اور تمام فریقین قومی سنجیدگی کا مظاہرہ کریں۔

حکومتی موقف کے مطابق اس معاملے پر کسی بھی قسم کی سیاسی پوائنٹ اسکورنگ مناسب نہیں، جبکہ ریاست اپنی آئینی اور قانونی ذمہ داریاں پوری کر رہی ہے۔