جیل میں بند بھارتی شہری کا ادکارہ جیکولین فرنانڈیز کیلیے ہوش اڑانے والا تحفہ

 200 کروڑ روپے کے منی لانڈرنگ کیس میں قید بھارتی شہری سوکیش چندراشیکھر نے ویلنٹائن ڈے پر ایک اور چونکا دینے والا دعویٰ کر دیا۔

بھارتی میڈیا کے مطابق جیل میں موجود سوکیش نے اداکارہ جیکولین فرنانڈیز کے نام خط لکھتے ہوئے کہا ہے کہ اس نے ان کے لیے 30 کروڑ روپے مالیت کا لگژری ایئربس ایچ سیریز ہیلی کاپٹر خریدا ہے۔

خط میں اداکارہ کو محبت بھرے القاب سے مخاطب کرتے ہوئے سوکیش نے دعویٰ کیا کہ ہیلی کاپٹر کو جے ایف کے ابتدائی حروف کے ساتھ خصوصی انداز میں تیار کیا گیا ہے تاکہ وہ شوٹنگ کے دوران آسانی سے سفر کر سکیں۔ اس نے یہ بھی کہا کہ تحفہ اس کی ذاتی کمائی سے خریدا گیا اور یہ اس کی محبت کی علامت ہے۔

یاد رہے کہ یہ پہلا موقع نہیں جب سوکیش نے مہنگے تحائف دینے کا دعویٰ کیا ہو؛ اس سے قبل بھی وہ کروڑوں روپے نقد اور دیگر قیمتی اثاثے دینے کی بات کر چکا ہے۔ تاہم جیکولین کی جانب سے اس تازہ دعوے پر تاحال کوئی ردعمل سامنے نہیں آیا۔