شہباز شریف اور قطری وزیراعظم کی اہم بیٹھک، تجارت و توانائی شراکت داری پر پیش رفت
قطر کے دارالحکومت میں ہونے والی اہم سفارتی ملاقات میں شہباز شریف نے قطر کے وزیراعظم و وزیر خارجہ شیخ محمد بن عبدالرحمن بن جاسم الثانی سے تفصیلی مذاکرات کیے، جن میں دوطرفہ تعاون سمیت علاقائی اور عالمی صورتحال پر تبادلہ خیال کیا گیا۔
ملاقات میں نائب وزیراعظم اسحاق ڈار، چیف آف آرمی اسٹاف سید عاصم منیر اور وفاقی وزیر اطلاعات و نشریات کے علاوہ وزیراعظم کے معاون خصوصی طارق فاطمی بھی شریک تھے۔
گفتگو کے دوران دونوں رہنماؤں نے پاکستان اور قطر کے درمیان دیرینہ برادرانہ تعلقات کو مزید مستحکم بنانے کے عزم کا اعادہ کرتے ہوئے سیاسی، اقتصادی اور ادارہ جاتی روابط میں بڑھتی پیش رفت پر اطمینان کا اظہار کیا۔
اس موقع پر تجارت و سرمایہ کاری، توانائی، دفاع، لیبر فورس اور ثقافتی شعبوں میں تعاون بڑھانے کے امکانات پر بھی تفصیلی تبادلہ خیال ہوا۔
فریقین نے مختلف شعبوں میں تعاون کو تیز کرنے کے لیے مشترکہ ٹاسک فورس کو اہم قرار دیا جبکہ مشترکہ وزارتی کمیشن اور دوطرفہ سیاسی مشاورت کے فورمز کو فعال رکھنے پر زور دیا گیا۔
حالیہ اعلیٰ سطحی روابط کے دوران کیے گئے فیصلوں پر عمل درآمد کو بھی دونوں ممالک کے لیے ضروری قرار دیا گیا۔
ملاقات میں غزہ کی صورتحال اور خلیجی خطے کی سلامتی سمیت علاقائی امور پر بھی گفتگو ہوئی، جبکہ وزیراعظم نے کشیدگی میں کمی اور مذاکرات کے فروغ کے لیے قطر کی سفارتی کوششوں کو سراہا۔
دونوں رہنماؤں نے تنازعات کے پرامن حل اور اقوام متحدہ کے چارٹر سمیت بین الاقوامی قوانین کی پاسداری کی اہمیت پر اتفاق کیا۔
اختتام پر پاکستان اور قطر کے درمیان اسٹریٹجک شراکت داری کو مزید مضبوط بنانے اور دوطرفہ، علاقائی و عالمی معاملات پر مسلسل رابطے میں رہنے کے مشترکہ عزم کا اعادہ کیا گیا۔
