سان فرانسسکو کی گلیوں میں بھٹکتے پہاڑی شیر کو وائلڈ لائف نے ریسکیو کر لیا

سان فرانسسکو کے پیسفک ہائٹس کے علاقے میں ایک نوجوان پہاڑی شیر کو سڑکوں پر بھٹکتے ہوئے دیکھا گیا، جسے کیلیفورنیا کی وائلڈ لائف اتھارٹیز نے کامیابی سے نشانہ لگا کر بے ہوش کیا اور محفوظ طریقے سے گرفتار کر لیا۔

شیر کو دو عمارتوں کے درمیان ایک تنگ راستے میں محصور کر کے قابو پایا گیا، جس کے بعد وہ مزید خطرے سے محفوظ رہا۔

یہ پہاڑی شیر سب سے پہلے اتوار کو لافایئٹ پارک کے قریب دیکھا گیا تھا اور پیر کو بھی اس کی موجودگی کی مزید اطلاعات آئیں۔ اس دوران کئی رہائشیوں نے جانور کی موجودگی کی ویڈیوز اور تصاویر بنائیں، جن میں ایک شہری کا تجربہ سب سے دلچسپ رہا۔

انہوں نے نجی ٹی وی کو بتایا کہ ہماری نظریں پانچ منٹ سے زیادہ ایک دوسرے پر جمی رہیں۔ میں واقعی شکر گزار ہوں کہ شیر نے مجھے نہیں کھایا اور ہم نے ایک دوسرے کی روح میں یہ طویل نظارہ کیا۔

اتھارٹیز کے مطابق تقریباً 2 سالہ یہ نوجوان شیر اوکلینڈ زو میں ویٹرنری معائنہ کے لیے لے جایا جائے گا، اور بعد میں فیصلہ کیا جائے گا کہ اسے کب اور کس طرح دوبارہ جنگل میں واپس بھیجا جائے۔