بنگلا دیش میں عام انتخابات کے لیے فوج تعینات، موٹر سائیکل چلانے پر پابندی

بنگلادیش میں جمعرات کو ہونے والے قومی پارلیمانی انتخابات کے موقع پر ملک بھر میں فوج کو تعینات کر دیا گیا ہے تاکہ انتخابات پر امن طریقے سے منعقد ہوں۔ ڈھاکا سمیت بڑے اور چھوٹے شہروں میں انتخابی مہم کا آخری روز مکمل ہوا۔

حکام نے اعلان کیا ہے کہ رات 12 بجے سے تین روز کے لیے موٹر سائیکل چلانے پر ملک گیر پابندی عائد رہے گی، تاکہ سیکیورٹی اور انتخابی عمل میں رکاوٹیں کم کی جا سکیں۔

ملک میں 300 پارلیمانی نشستوں کے لیے 1,981 امیدوار میدان میں ہیں، اور حکومت بنانے کے لیے 151 نشستوں پر اکثریت حاصل کرنا لازمی ہے۔

یہ انتخابات اگست 2024 میں سابق وزیر اعظم شیخ حسینہ کے استعفیٰ اور ملک چھوڑنے کے بعد پہلا موقع ہیں، جب نوبل انعام یافتہ ڈاکٹر محمد یونس عبوری حکومت کے سربراہ کے طور پر ذمہ داریاں سنبھال چکے ہیں۔

حالیہ عوامی سروے کے مطابق بنگلادیش نیشنلسٹ پارٹی (بی این پی) کی قیادت میں اتحاد کو 44.1 فیصد ووٹ ملنے کا امکان ہے، جبکہ جماعتِ اسلامی کے زیر قیادت 11 جماعتوں کے اتحاد کو 43.9 فیصد ووٹ مل سکتے ہیں، جس سے سخت مقابلے کی پیش گوئی کی جا رہی ہے۔