بھارت میں ویلنٹائن ڈے پر گدھوں کی شاہانہ شادی

محبت کے عالمی دن پر جہاں دنیا بھر میں جوڑے ایک دوسرے کو سرخ گلاب پیش کرتے ہیں، وہیں بھارت کے شہر بنگلورو میں ایسا منظر دیکھنے کو ملا جس نے سوشل میڈیا صارفین کو حیران بھی کیا اور مسکرانے پر بھی مجبور کر دیا۔

ویلنٹائن ڈے کے موقع پر مقامی افراد نے دو گدھوں کی باقاعدہ شادی کی تقریب منعقد کی۔ جانوروں کو دلہن اور دلہا کی طرح سجایا گیا، رنگ برنگے پھولوں کے ہار پہنائے گئے اور روایتی موسیقی کے ساتھ تقریب کو تہوار کا رنگ دیا گیا۔ حاضرین نے تالیاں بجا کر اس منفرد جوڑے کو مبارکباد بھی دی۔

تقریب کے منتظمین کا کہنا تھا کہ محبت صرف انسانوں تک محدود نہیں ہونی چاہیے۔ ان کے بقول چاہے وہ انسان ہو، پرندہ ہو یا جانور، ہر جاندار احترام اور محبت کا مستحق ہے۔

یہ دلچسپ تقریب 14 فروری کو منائے جانے والے عالمی دنِ محبت کے موقع پر منعقد کی گئی، جسے دنیا بھر میں ویلنٹائن ڈے کے نام سے جانا جاتا ہے۔ اس دن لوگ عموماً سرخ گلاب اور تحائف کے ذریعے اپنے جذبات کا اظہار کرتے ہیں، مگر بنگلورو کی اس تقریب نے روایت سے ہٹ کر سب کی توجہ اپنی جانب مبذول کر لی۔

سوشل میڈیا پر اس انوکھی شادی کی تصاویر اور ویڈیوز تیزی سے گردش کر رہی ہیں، اور صارفین اسے ویلنٹائن ڈے کا سب سے منفرد جشن قرار دے رہے ہیں۔