ٹی 20 ورلڈ کپ، فتح کے باوجود پاکستان سیمی فائنل میں پہنچ نہ سکا

آئی سی سی ٹی20 ورلڈ کپ کے سپر ایٹ مرحلے کے اہم معرکے میں پاکستان نے سری لنکا کو 5 رنز سے زیر کیا، مگر مطلوبہ مارجن حاصل نہ ہونے کے باعث گرین شرٹس سیمی فائنل کی دوڑ سے باہر ہوگئے۔

آئی سی سی مینز ٹی 20 ورلڈ کپ 2026 کے دسویں سپر ایٹ میچ میں پاکستان نے پہلے بیٹنگ کرتے ہوئے 212 رنز کا مضبوط مجموعہ ترتیب دیا۔ اوپنرز نے جارحانہ انداز اپنایا اور ابتدا ہی سے سری لنکن باؤلرز پر دباؤ برقرار رکھا۔

صاحبزادہ فرحان نے شاندار سنچری اسکور کی جبکہ فخر زمان نے 84 رنز کی برق رفتار اننگز کھیل کر اسکور کو 200 کے پار پہنچایا۔ مڈل آرڈر خاطر خواہ مزاحمت نہ دکھا سکا، تاہم ابتدائی شراکت نے ٹیم کو مسابقتی ہدف دینے میں کلیدی کردار ادا کیا۔

جواب میں سری لنکا نے ہدف کا تعاقب اعتماد کے ساتھ کیا۔ کپتان داسن شناکا نے 31 گیندوں پر ناقابلِ شکست 76 رنز کی دلکش اننگز کھیل کر میچ کو آخری اوور تک سنسنی خیز بنائے رکھا۔ پوون رتھنائیکے نے نصف سنچری اسکور کی جبکہ دیگر بیٹرز نے بھی مختصر مگر اہم حصہ ڈالا، تاہم ٹیم 207 رنز تک محدود رہی۔

پاکستان کی جانب سے ابرار احمد نے تین اہم وکٹیں حاصل کیں، جبکہ نسیم شاہ، محمد نواز اور شاہین شاہ آفریدی نے ایک، ایک کھلاڑی کو آؤٹ کیا۔ دلچسپ مقابلے کے باوجود رنز کا فرق سیمی فائنل تک رسائی کے لیے ناکافی ثابت ہوا اور یوں فتح بھی پاکستان کے کام نہ آسکی۔