اگر خامنہ ای چاہیں تو صدر ٹرمپ سے ملاقات ہو سکتی ہے، مارکو روبیو

عالمی سفارتی منظرنامے میں اہم پیش رفت سامنے آئی ہے جہاں امریکی وزیر خارجہ مارکو روبیو نے اشارہ دیا ہے کہ امریکی صدر ڈونلڈ ٹرمپ ایران کے ساتھ کشیدگی کم کرنے اور ممکنہ معاہدے کے لیے تیار ہیں حتیٰ کہ اگر ایران کے سپریم لیڈر علی خامنہ ای  براہِ راست ملاقات کی خواہش ظاہر کریں تو بھی۔

میونخ سیکیورٹی کانفرنس  کے موقع پر انٹرویو دیتے ہوئے روبیو نے کہا کہ ٹرمپ کا مؤقف واضح ہے مسائل میز پر بیٹھ کر حل ہوتے ہیں، میدان میں نہیں۔

ان کے بقول اگر تہران کی جانب سے باضابطہ درخواست آتی ہے تو ملاقات خارج از امکان نہیں۔

روبیو نے مشرقِ وسطیٰ میں دوسرا امریکی طیارہ بردار بحری جہاز بھیجنے کے فیصلے کو دفاعی حکمتِ عملی کا حصہ قرار دیتے ہوئے کہا کہ یہ اقدام خطے میں کسی بھی ممکنہ اشتعال انگیزی کو روکنے کے لیے کیا گیا ہے تاکہ ایران کوئی ایسا قدم نہ اٹھائے جو وسیع تر تنازع کو جنم دے۔