امریکی دباؤ کا غیر معمولی جواب دیں گے، ایران کا دوٹوک انتباہ
اقوامِ متحدہ میں ایران کے مستقل مشن نے امریکا کو سخت پیغام دیتے ہوئے واضح کیا ہے کہ اگر ایران پر فوجی یا سیاسی دباؤ بڑھایا گیا تو اس کا ردعمل ایسا ہوگا جو ماضی میں کبھی دیکھنے میں نہیں آیا۔
ایرانی مشن کا کہنا ہے کہ تہران اب بھی بات چیت کا حامی ہے، مگر دباؤ اور دھمکیوں کی پالیسی کو ہرگز قبول نہیں کیا جائے گا۔
آج جاری ہونے والے بیان میں ایرانی مشن نے کہا کہ ایران باہمی احترام، مساوی مفادات اور انصاف کی بنیاد پر مذاکرات کے لیے تیار ہے، تاہم اگر امریکا نے طاقت کا راستہ اختیار کیا تو ایران اپنے دفاع کا حق استعمال کرے گا اور ایسا جواب دے گا جو تاریخ میں مثال بن جائے گا۔
ایرانی بیان میں امریکا کی سابقہ جنگی مہمات کا حوالہ دیتے ہوئے کہا گیا کہ عراق اور افغانستان میں مداخلت نے امریکا کو سات کھرب ڈالر سے زائد کا معاشی نقصان پہنچایا جبکہ سات ہزار سے زیادہ امریکی فوجی مارے گئے، جو طاقت کے استعمال کی بھاری قیمت کی واضح مثال ہے۔
