جوہری معاہدہ کرو ورنہ اگلا حملہ تباہ کن ہوگا، ٹرمپ کی ایران کو کھلی دھمکی

امریکی صدر ڈونلڈ ٹرمپ نے سوشل میڈیا ایپ ٹروتھ سوشل کی توسط سے ایران کو ایک بار پھر سخت وارننگ دیتے ہوئے کہا ہے کہ اگر تہران نے فوری طور پر جوہری معاہدے پر مذاکرات شروع نہ کیے تو امریکا کا اگلا فوجی حملہ پہلے سے کہیں زیادہ خطرناک اور تباہ کن ہوگا۔

صدر ٹرمپ نے اپنی پوسٹ میں لکھا کہ انہیں امید ہے ایران جلد از جلد مذاکرات کی میز پر آئے گا اور ایک منصفانہ اور مساوی جوہری معاہدہ کرے گا، جس میں کسی صورت جوہری ہتھیار شامل نہ ہوں۔ ٹرمپ کے مطابق وقت تیزی سے ختم ہو رہا ہے اور اب فیصلہ کن لمحہ آ چکا ہے۔

امریکی صدر نے یاد دلایا کہ ان کی گزشتہ وارننگ کے بعد جون میں امریکا نے فوجی کارروائی کی تھی اور خبردار کیا کہ آئندہ کارروائی اس سے کہیں زیادہ شدید ہوگی۔ ٹرمپ نے یہ بھی دہرایا کہ امریکا کا ایک بڑا بحری بیڑا ایران کی سمت بڑھ رہا ہے، جو کسی بھی ہنگامی صورتحال میں فوری کارروائی کی مکمل صلاحیت رکھتا ہے۔